Біцько Валянцін Сцяпанавіч
(02.05.1919-14.04.1981)
Нарадзіўся Біцько ў с.Вялікая Салтанаўка Васількаўскага раёна Кіеўскай вобласці. У Чырвонай Арміі з 1939г. Пасля заканчэння ў 1941 г. Астраханскага стралкова-кулямётнага вучылішча ў званні лейтэнанта праходзіў службу ў г.Даўгаўпілс.
У першы дзень вайны часць, у якой служыў В.С.Біцько, уступіла ў бой з дэсантам гітлераўцаў. Валянцін Сцяпанавіч быў цяжка паранены, папаў у палон, уцёк. У дарозе адкрыліся раны. Сяляне в. Вензавец Дзятлаўскага раёна Антон Белавус і Алёна Губар далі прытулак раненаму салдату. Праз іх В.С. Біцько пазнаёміўся з савецкімі актывістамі, а тыя дапамаглі яму звязацца з Мікалаем Вахоніным, Васілём Кавязіным і іншымі былымі ваеннаслужачымі, якія жылі ў суседніх вёсках.
Так з красавіка 1942г. В.С. Біцько ўключыўся ў барацьбу з нямецка-фашысцкімі захопнікамі ў радах партызан. Камандаваў партызанскай групай, ротай. Стаў адным з арганізатараў партызанскага атрада "Арлянскі", які дзейнічаў на тэрыторыі Дзятлаўскага раёна. З ліпеня 1943г. В.С.Біцько - камандзір Ленінскага партызанскага атрада. Пад камандаваннем Біцько Ленінскі атрад пусціў пад адхон 22 эшалоны, вывеў са строю 23 паравозы, 118 вагонаў, 2 чыгуначныя масты, парэзаў 10 км тэлефоннай сувязі, узарваў 35 аўтамашын, разграміў нямецка-фашысцкія гарнізоны ў Рудзе Яварскай, Жалудку і іншых месцах. Узяў у палон шмат нямецкіх салдат.
Пасля вайны В.С. Біцько працаваў старшынёй Дзятлаўскага выканкама, загадчыкам аддзела Дзятлаўскага РК КП, дырэктарам ільнозавода, дырэктарам камбіната камунальнай гаспадаркі.
Памёр В.С. Біцько 14.4.1981 года.
Літаратура:
Валянцін Сцяпанавіч Біцько // Памяць: гіст. - дакум. хроніка. - Мн.,1997. - С.179-180.
Валянцін Сцяпанавіч Біцько // Их именами названы: энциклопедический справочник. - Мн., 1987. - С.26.
Палховіч,Т. Валянцін Сцяпанавіч Біцько / Т.Палховіч // Перамога. - 2004. - 19 мая. - С.1.