Кароль Сцяпан Георгіевіч
(02.12.1894-20.01.1975)
Сцяпан Георгіевіч Кароль ў в. Дварэц Слонімскага павета (цяпер Дзятлаўскі раён) у сям'і селяніна-бедняка.
У пачатку імперыялістычнай вайны яго прызвалі ў армію. Папаў радавым у авіяцыйную эскадрыллю. Ваяваў у 29-м авіяцыйным атрадзе на Заходнім фронце, спачатку на тэрыторыі Беларусі, потым у Прыбалтыцы.
У час Кастрычніцкай рэвалюцыі Сцяпан Георгіевіч Кароль быў выбраны членам ваенна-рэвалюцыйнага камітэта авіяатрада.
3 ліпеня 1919г. па сакавік 1920 г. Кароль вучыўся ў Ягор'еўскай авіяшколе пад Масквой, удзельнічаў у баях супраць Дзянікіна.
Вясной 1933г. Кароль быў прызначаны камандзірам і камісарам 53-й авіябрыгады Беларускай ваеннай акругі ў Бабруйску. Адначасова кіраваў будаўніцтвам аэрадрома і ваеннага гарадка.
У ліпені 1935г. пасля заканчэння Ваенна-паветранай акадэміі імя Жукоўскага яго накіроўваюць камандзірам 65-й знішчальнай авіябрыгады ў Жытомір.
За другое месца ў аглядзе брыгад Сцяпана Георгіевіча Караля ўзнагародзілі ордэнам Чырвонай Зоркі і машынай "эмка".
Летам 1937г. у палку пачаліся масавыя арышты. С.Г.Караля вызвалілі ад камандавання, выключылі з партыі. Жыццё сям'і было пад пагрозай.
У пачатку 1939г., калі рэпрэсіі крыху спыніліся, Караля выклікалі на партыйную камісію і ўзнавілі ў партыю.
У пачатку Вялікай Айчыннай вайны С.Г.Караля прызначылі намеснікам камандуючага Паўночна-Каўказскай зоны супрацьпаветранай абароны, у маі 1942г. - камандзірам 148-й знішчальнай авіядывізіі супрацьпаветранай абароны. Дывізія ўдзельнічала ў бітве на Курскай дузе.
Сцяпан Георгіевіч Кароль памёр 20 студзеня 1975г. у Кіеве. Радзіма высока адзначыла яго заслугі, узнагародзіўшы ордэнам Леніна, ордэнам Кутузава ІІ ступені, трыма ордэнамі Чырвонага Сцяга, двума - Айчыннай вайны І ступені, Чырвонай Зоркі і многімі медалямі.
Літаратура:
Кароль Сцяпан Георгіевіч // Памяць: гіст. - дакум. хроніка. - Мн.,1997. - С.202-203.
Кароль Сцяпан Георгіевіч // Энцыклапедыя гісторыі Беларусі: у 6 т. - Мн., 1997. - Т.4. - С.123.
Кароль Сцяпан Георгіевіч // Беларуская энцыклапедыя: у 18т. - Мн., 1999. - Т.8. - С.89.
Казарыцкі,В. Слаўны шлях генерала / В.Казарыцкі // Перамога. - 1977. - 9 ліпеня. - С.2.
Казарыцкі,В. Генерал С.Г.Кароль / В.Казарыцкі // Перамога. - 1978. - 23 лютага. - С.2.
