Салодкая
Святлана Аляксандраўна
Ансамбль: "Свята"... Тут сабраліся людзі асаблівыя, самаадданыя, а то і фанатычныя рупліўцы роднай культуры і яе самабытнасці. Святлана Аляксандраўна Салодкая - душа ансамбля. Імя гэтай спявачкі, лаўрэата многіх конкурсаў і фестываляў не зыходзіць з канцэртных афіш як у рэспубліцы, так і за яе межамі. Салістка Белдзяржфілармоніі, заслужаная артыстка Рэспублікі Беларусь Святлана Салодкая заўсёды карыстаецца поспехам у публікі.
Жыццё яе было нялёгкім. Бацька - інвалід Вялікай Айчыннай вайны - памёр, калі дзяўчынцы было ўсяго два гады. Засталася з маці, сястрой і трыма братамі. Але ішоў час. Вучылася ў школе, актыўна ўдзельнічала ў мастацкай самадзейнасці. Тут Святлана пазнала многа народных песень, адчула асалоду ў творчасці. Асабліва палюбіла роднае слова. А спяваць пачала з малога ўзросту. Гэтаму яе навучыла маці - Тамара Іванаўна, якая сама была непасрэднай удзельніцай свят, абрадаў, вячорак у вёсцы Дудзічы, што на Дзятлаўшчыне.
Вялікая фальклорная спадчына дасталася Святлане ад маці. Неўзабаве паступіла на харавое аддзяленне Баранавіцкага музычнага вучылішча. У 1978 г. скончыла і была накіравана ў Дзяржаўны народны хор імя Г. Цітовіча. 3 таго часу звязала жыццё з народнай песняй, прапагандуе песенную спадчыну нашага народа.
- Музыка і слова цесна звязаны паміж сабою, - кажа яна. - А песенны скарб нашага народа, бадай, самы багаты ў свеце. Прапагандаваць беларускае слова трэба найперш праз цудоўныя беларускія песні, песенны фальклор, бо слова з мелодыяй лепш даходзіць да сэрцаў людзей.
У 1984 г. пры Белдзяржфілармоніі быў створаны ансамбль народнай музыкі "Свята". Сюды запрасілі працаваць і Святлану Аляксандраўну. Тут яна яшчэ глыбей пазнаёмілася з народнай песняй. У час паездак па роднай Беларусі ўважліва слухала старэнькіх бабуль і дзядуль, старанна запаўняла магнітафонныя касеты фальклорнымі скарбамі. Добра ведаючы каляндарна-абрадавую, сямейна-абрадавую паэзію, Святлана дала багаты матэрыял, які знайшоў увасабленне ў ансамблі народнай музыкі "Свята". Высокапрафесійны, унікальны ў сваім родзе калектыў ансамбля - актыўны прапагандыст дасягненняў беларускай кулыуры.
Глыбока сімвалічная і назва ансамбля. "Свята" - значыць святкаваць, адпачываць. I трэба сказаць, што сваёй назве ён адпавядае. А калі ўлічыць нашу цяперашнюю цікавасць да фальклору, дык з'яўленне ансамбля "Свята" можна лічыць сапраўдным святам. Канцэпцыя творчасці - нагадаць старадаўнія беларускія песні і танцы, адрадзіць колішнія культурныя традыцыі Беларусі.
У выкананні Святланы Салодкай гордыя, трагічныя, гарэзлівыя льюцца і льюцца са сцэны беларускія песні - сапраўдныя нацыянальныя дыяменты.
Літаратура: Бараноўскі,П.М. Салодкая Святлана Аляксандраўна / П.М.Бараноўскі // Памяць: гіст.-дакум. хроніка Дзятлаўскага р-на. - Мн., 1997. - С.351.