Пачатак лета — гэта заўсёды час для весялосці, драйву і незабыўных прыгод. Менавіта такую атмасферу падарыла дзецям Дзятлаўская раённая бібліятэка, якая 3 чэрвеня запрасіла хлопчыкаў і дзяўчынак на незвычайнае свята. На некалькі гадзін бібліятэчная пляцоўка ператварылася ў сапраўдны “БібліяАрбат” — чароўны свет, напоўнены звонкім смехам, творчасцю і сапраўднымі цудамі.
З самага пачатку свята дзеці траплялі ў вір весялосці, бо на пляцоўцы іх сустракалі самыя бліскучыя майстры добрага настрою — вясёлы клоўн Клёпа і абаяльная клоўнеса Ірыска. Яны імгненна зарадзілі кожнага госця пазітывам, наладзілі на гульнявы лад і дапамаглі хлопчыкам і дзяўчынкам падзяліцца на каманды.
Каб падарожжа па нашым “Арбаце” было па-сапраўднаму азартным, кожная каманда атрымала спецыяльную карту падарожніка. Задача была творчай: прайсці чатыры неверагодныя лакацыі, на кожнай з якіх трэба было выканаць заданні і атрымаць запаветны смайлік.
Першай сустракала гасцей “Казачная лакацыя”. Тут дзяцей чакаў сюрпрыз — сустрэча з самай харызматычнай гераіняй лясных казак, Бабай-Ягой, і яе вернай сяброўкай Кікімарай. Трэба сказаць, што лясныя госці прыйшлі з добрымі намерамі: яны закруцілі дзяцей у цэлым калейдаскопе рухомых гульняў і запальных танцаў.
Не менш гарачага прыёму патрабавала і “Тэатральная лакацыя”. Яна запрасіла юных гасцей уключыцца ў захапляльны квэст-дэтэктыў  “У пошуках залатога ключыка”. Хітрая ліса Аліса і вясёлы кот Базіліа вельмі стараліся заблытаць сляды і схаваць таямніцу. Аднак супраць стаяць кемлівасці, логіцы і акцёрскаму майстэрству дзятлаўскіх рабят было немагчыма — справядлівасць у выніку перамагла!
Адчуць дух роднага краю і дакрануцца да вытокаў дапамагла “Фальклорная лакацыя”. Гэта месца, дзе літаральна ажывалі народныя традыцыі, трапныя прымаўкі і старадаўнія забавы. Гэтую пляцоўку з любоўю і веданнем справы падрыхтавалі бібліятэкары з Раклевіцкай і Хвінявіцкай інтэграваных сельскіх бібліятэк-клубаў. Дзеці з вялікім азартам уключаліся ў гульні, у якія калісьці гулялі яшчэ іх прабабулі і прадзядулі.
Для тых, хто прагнуў актыўнага руху і інтэлектуальных баталій, працавала “Гульнёвая лакацыя” — тэрыторыя абсалютнага драйву і безлімітных забаў. Тут рабят чакалі шашкі, настольныя гульні і мноства іншых цікавостак, дзе кожны змог знайсці занятак па душы і праявіць свае здольнасці. Самыя актыўныя удзельнікі былі ўзнагароджаны дыпломамі.
Пачатак лета аказаўся незабыўным!