Бліскучая навіна прыйшла на Дзятлаўшчыну: бібліятэчны праект Дзятлаўскай раённай бібліятэкі ўвайшоў у лік пераможцаў маштабнага Міжнароднага конкурсу “Чытаючая сям’я — чытаючая краіна”. У намінацыі “Тэрыторыя сямейнага чытання” (катэгорыя “Прафесіяналы”) ганаровае 3 месца заваяваў калектыў аддзела маркетынгу, сацыякультурнай дзейнасці, метадычнай работы і фарміравання бібліятэчнага фонда ДУК “Дзятлаўская раённая бібліятэка”. Кіраўніком гэтага цудоўнага праекта з’яўляецца бібліятэкар аддзела маркетынгу Алена Якаўчык.
У чым сакрэт “Магіі чытання”?
Гэты праект выконвае найважнейшую і вельмі высакародную місію — ён фарміруе ў дашкольнікаў устойлівую цікавасць і любоў да кніг праз чароўнае тэатральнае мастацтва і сумесны сямейны дасуг. Бо калі любімая казка ажывае прама на вочках у дзіцяці, а звычайныя бібліятэкары ператвараюцца ў добрых чараўнікоў, не палюбіць чытанне проста немагчыма! “Магія чытання” даўно стала неад’емнай і вельмі важнай часткай культурнага і адукацыйнага жыцця нашага райцэнтра. Дзятлаўская раённая бібліятэка звязана трывалымі ніткамі цеснага супрацоўніцтва з дашкольнымі ўстановамі адукацыі горада. Штомесяц яркія, каляровыя і захапляльныя пастаноўкі праходзяць на базах двух дзіцячых садоў горада — №1 і №2. Самыя маленькія жыхары Дзятлава з вялікім нецярпеннем і шчырым хваляваннем чакаюць кожнай новай сустрэчы з ажыўшымі кніжнымі героямі.
Віншуем калектыў з Перамогай!